Kyali Kijjobi e Mbaale
Abazzukulu okuva e Bule ne Bweya enkoko twazikwata mimwa ne tutandika okweyiwa ku Kiggwa kyaffe kino. Essaawa zagenda okuwera ennya ez`enkya nga abagenyi abakulu, bajjajjaffe ab`Amasiga wamu n`abakulu b`enzikiriza nga bakkalidde bulungi mu bifo byabwe. Ye Jjajjaffe Lwomwa yatuuka ku ssaawa ttaano nga yajja n`omugenyi we ow`enjawulo – Omutaka Omukulu w`Ekika ky`Amazzi g`Ekisasi, awamu n`abakungu be ab’oku mwanjo omwali Omumyuka wa Katikkiro w`Ekika – Omutaka Eria Buzaabo Lwasi, n`Omuwandiisi w`Ekika – Owek. Robert Nviiri.
Olunaku lw`Omukaaga nga 18 March 2023, e Mbaale mu Mawokota awali obutaka bwaffe ab`Endiga obukulu wawuuma ne wakatagga! Anti Jjajjaffe Lwomwa ku lunaku olwo kwe yatugabulirako ffenna abazzukulu be ekijjulo makeke nga atuyozaayoza era n`okutukulisa okuwangula Engabo y`emipiira gy`Ebika by`Abaganda omulundi ogw`asooka bukya mpaka ezo zitandikibwawo.
Abazzukulu okuva e Bule ne Bweya enkoko twazikwata mimwa ne tutandika okweyiwa ku Kiggwa kyaffe kino. Essaawa zagenda okuwera ennya ez`enkya nga abagenyi abakulu, bajjajjaffe ab`Amasiga wamu n`abakulu b`enzikiriza nga bakkalidde bulungi mu bifo byabwe. Ye Jjajjaffe Lwomwa yatuuka ku ssaawa ttaano nga yajja n`omugenyi we ow`enjawulo – Omutaka Omukulu w`Ekika ky`Amazzi g`Ekisasi, awamu n`abakungu be ab’oku mwanjo omwali Omumyuka wa Katikkiro w`Ekika – Omutaka Eria Buzaabo Lwasi, n`Omuwandiisi w`Ekika – Owek. Robert Nviiri.
Emikolo gyajjibwako akawuuwo ku ssaawa ttaano n`eddakiika ana (5. 40) ez’enkya n`okusaba okwalimu ennyingo ssatu. Ennyingo eyasooka yakulemberwa Omuwalimu era Omutaka Yusuf Ali Kabaale. Eyokubiri yawomwamu omutwe Rev. Father Claudio Ssegonja okuva mu Nnakawuka Catholic Parish. N`eyokusatu n’etembetebwa Rev. Steven Lumu Lwasi okuva mu Mutundwe COU Parish. Bakadde baffe abo bonsatule b`atukubiriza okulaga okusiima kwaffe eri Omutonzi olw`ekkula lye yatukolera okuwangula Engabo ey`omwaka 2022. Ebigambo by`abakulu abo by`ajjulirizibwa ebya Jjajja Lwomwa, Omutaka Eng. Daniel Bosa, bwe y`atukubiriza okwewala okuvvoolanga eby`obuwangwa bwaffe nga twesigama ku nzikiriza zaffe ze tusinzizaamu Omutonzi waffe.
Nga okuwonga omukolo eri Omutonzi kuwedde, kalabaalaba w`omukolo y`abikkula ekyama nti yadde ensonga enkulu yali ya kujaganya olw`obuwanguzi bwaffe mu mipiira gy`Ebika, waaliiwo emirimu emirala emikulu egyali gigenda okukolebwa. Mu buwufu obwo yasaba Jjajja Lwomwa okukola omulimu ogwasooka – okutongoza oluyimba olutongole olw`Ekika kyaffe. Jjajja oluyimba yalutongoza nga awerekerwako emizira egy`omwanguka okuva mu bazzukulu ffenna. Awo ffenna ne tugolokoka ne tuteeka ekitiibwa mu Ggwanga lyaffe, Ensi yaffe n`Ekika kyaffe nga tuyimba oluyimba lwa Uganda, olwa Buganda nolw`Ekika ky`Endiga.
Ebyo bwe byaggwa, Ssentebe w`ekyalo okuli Ekiggwa kyaffe, omulongo Kamya Kisitu ow`effumbe y`aweebwa omukisa okutwaniriza mu kitundu kye. Kirina okujjukirwa nti Effumbe yemu ku ttiimu ze twafufuggaza mu lugendo lwaffe olw`okuwangula engabo. Yadde ekyo kiri bwekityo, Ssentebe Kamya Kisitu yekakaba n`atuyozaayoza mu mwoyo gwobwa sseruganda. Nga amalirizza, yayita Councilor w`ekitundu ku Mpigi Town Council – omwami Peter Kiggundu
Tamale, okubeerako by`atutuusaako. Ono yatutegeeza nga Ekiggwa kyaffe bwe kiri ekimu ku by`obulambuzi ebikulu ebiri mu Mpigi Town Council. Kye yava atusaba okukikulaakulanya kituukane n`ettutumu lye kirina mu kitundu era ne mu nsi yonna.
Kalabaalaba w`emikolo yaddamu okusaba Jjajja Lwomwa okukola omulimu ogwokubiri. Guno gwali gwa kwanjula Olukiiko Olufuzi olw`Ekika. Luno wammanga lwe lukiiko olwo nga bwe lw`ayanjulwa Lwomwa:
- Katikkiro – Omutaka Edward Ssemukuutu.
- Omumyuka wa Katikkiro – Omutaka Eria Buzaabo Lwasi.
- Owa Guno na guli – Haji Yusufu Ali Kabaale.
- Omukubiriza – Christopher Kalyesubula Kaduumya.
- Omumyuka w’Omukubiriza – Omutaka John Ssebwato.
- Omuwandiisi – Owek. Robert Nviiri.
- Omumyuka w`Omuwandiisi – Omutaka Badru Kiyingi.
- Owamawulire – Omutaka Steven Sserunkuuma.
- Ow`entekateeka n`enkulakulana – Omutaka Paul Kiyingi Luwombo.
- Ekikula ky`abantu, abavubuka n`emizannyo – Muky. Justine Nansereko Namitala. 11. Ow`ebyensimbi / Omuwanika – Omutaka Badru Kiguli.
- Omumyuka w`Omuwanika – Mw. Lawrence Kasakya.
Wano omukolo we gwatuukira ku mulamwa omukulu ogw`olunaku – okwanjulira Lwomwa Engabo eyawangulwa ttiimu yaffe. Team Manager, Team Captain abazannyi n`abakungu ba ttiimu b`asitula engabo ne bagitwalira Jjajja Lwomwa we yali atudde. Emizira, obuluulu obw`olulekereeke awamu n`okusaakaanya eby`omwanguka by`asaanikira ekifo kyonna. Ebifaananyi ebyakubibwa byali lukunkumuli; anti nga kyenkana buli omu yewagaanya n`essimu ye abeereko ekifaananyi kyakwasa! Ddala ddala kyali kijjobi! Abantu bangi abeebazibwa mu ngeri ey`enjawulo. Mwabo mwalimu Dr. Sarah Nkonge, Owek. Joyce Nabbosa Ssebuggwaawo, Omut. Eria Buzaabo Lwasi n`omwami Ken Nakabaale owa Kenny Products.
Waliwo abantu kinnoomu abaasiima ttiimu yaffe mu ngeri ey`enjawulo. Omwami Ken Nakabaale y`akwasa buli muzannyi ebbaasa eyalimu emitwalo etaano. Owek. Joyce Nabbosa Ssebuggwawo naye buli muzannyi namukwanga ebbaasa eyalimu emitwalo abiri. Abazannyi era b`akwasibwa embuzi okwokebwa bagiriirewo.
Ekyaddirira kyali kya kalabaalaba w`emikolo okwanjula bajjajja ab`Amasiga abaaliwo. Bano baali Jjajja Ssekasamba, Jjajja Ssemiti, Jjajja Kiguli, Jjajja Buvi, Jjajja Ssekakoni, Jjajja Namusota, Jjajja Kibeevu, Jjajja Kaggwe ne Jjajja Nakabaale. Nate era yayanjula ne Bakatikkiro b’Amasiga abaaliwo omwali owa Kibeevu, Kaggwe, Luwanga, Lutalo, Kiguli, ne Ndalu.
Aboogezi ku mukolo baali bangi era n`ensonga nnyingi ezayogerwako. Mu ezo mwalimu okukuuma ennono n`obulombolombo byaffe, okwekulakulanya mu maka gaffe, okukolerera Ekika era n`okukiweereza, okuwuliziganya era n`okwagalana. Ye Jjajja Lwomwa nga ekiseera kye kituuse okwogerako gyetuli, omukisa yasooka n’aguwa owek. J. N. Ssebuggwawo eyatukubiriza okweyambisanga enteekateeka za Gavumenti ez`ebyenkulakulana nga eya Parish Development Model. Jjajja era yawa omugenyi we ow`enjawulo omukulu w`Ekika ky`Amazzi g’e Kisasi, Omutaka Wooyo David Muyanja, akadde naye n`atubuuzaako. Ebigambo bya Jjajja Lwomwa byali bya kusiima emirimu emirungi egy`eyolekera mu buwanguzi bwa ttiimu yaffe. Jjajja era y`ategeeza nti waali waliwo emirimu mingi egitegekeddwa nga omwo mwemuli okuzimba bbugwe ku Kiggwa era n`okumuzimbira ennyumba entongole mu kifo ekyo. Yavumirira nnyo emize emigwiira, nga ebisiyaga, egitandise okusensera ensi yaffe. Yeebaza abo bonna abaali mu nteekateeka y`omukolo era n`ayagaliza buli omu ekiseera ekirungi.
Omulimu ogwaddirira Jjajja gwe y`akola kwali okutongoza enteekateeka Nnamutaayiika ey`emyaka etaano okugenda okutambulizibwa emirimu n`ensonga z`Ekika. Enteekateeka eyo y`ateekebwa mu kitabo ekitegeke obulungi era kkoppi zaakyo, kasita Jjajja yamala okugitongoza, ne zitandika okutundibwa mu bazzukkulu abaaliwo. Buli kkoppi egula ssiringi emitwalo ebiri. Ku olwo, enteekateeka eno yayitibwayitibwamu mu bufunze Omukubiriza Omutaka Christopher Kalyesubula Kaduumya. Kyategerekeka nga waliwo ebimaze okutuukibwako, gamba nga okutandikawo omutimbagano omutongole ogw`Ekika oguli ku ndagiriro www.abazirandiga.website.
Omulimu ogwasembayo gwali ogw`okutema evvuunike erya bbugwe w`Ekiggwa. Lwomwa nga abugiriziddwa ab`Amasiga abaaliwo, wamu n`abakulu abalala, yatema evvuunike lya bbugwe w`Ekiggwa. Kyategeezebwa okuva mu bakulu abavunanyizibwa ku mulimu ogwo nti gwa kumalirizibwa mu bbanga lya myezi mukaaga gyokka.
Essaawa zaali zewerekedde kubanga zaali ziweze mwenda. Bwatyo Jjajja Lwomwa, mu kiseera ekyo, yatandika okugabula bazzukulu be ekijjulo makeke nga kimaze okusabirwa Rev. Eriya Ssekyaya Katikkiro wa Ssekasamba!
Owange, okutambula kulaba ate okudda kunyumya. Naye amazima ddala kyali kijjobi e Mbaale!